O Deportivo completou este sábado a súa colección de equipacións para a tempada 2026-27 coa presentación da terceira camiseta, que saíu á luz o 25 de xullo, coincidindo co Día de Galicia. O club mantén así o costume de reservar esta data para render homenaxe a Galicia, nesta ocasión a través do mar e da tradición mariñeira.
A Cruz de San Andrés, do Riazor orixinal á camiseta
A gran protagonista do deseño é a Cruz de San Andrés, situada na parte frontal da camiseta. Trátase dun símbolo ligado historicamente á tradición marítima coruñesa, durante o século XIX formou parte da insignia da provincia marítima da Coruña.
A conexión deste símbolo co Deportivo remóntase ao deseño orixinal do Estadio de Riazor, que luciu estas cruces na súa balaustrada desde a súa construción ata a remodelación con motivo do Mundial de 1982. Na actualidade aínda se conservan algunhas na Torre de Maratón.
O club explica que recupera este elemento como expresión da identidade atlántica que comparten Galicia, A Coruña e a propia entidade, e como referencia ao vínculo do deportivismo co mar desde as súas orixes.
Branco e azul Dépor, cun patrón de ondas
O deseño aposta polo branco como cor de fondo, combinado co renovado azul Dépor, protagonista da identidade visual actualizada recentemente polo club. Con este azul debúxase a Cruz de San Andrés, que incorpora un patrón gráfico inspirado no movemento das ondas.
Como xa ocorreu coa primeira e a segunda equipación, a camiseta luce o parche conmemorativo do 120 aniversario, distintivo que acompañará todas as equipacións desta tempada.
𝘼 𝘾𝙤𝙧𝙪𝙣̃𝙖, 𝙩𝙚𝙧𝙧𝙖 𝙙𝙚 𝙢𝙖𝙧.
Feliz Día de Galicia, deportivistas! 💙 pic.twitter.com/3n76bjCcBy
— RC Deportivo (@RCDeportivo) July 25, 2026
Prezos e dispoñibilidade
A terceira equipación xa está á venda na tenda online do club (deportienda.es) e nos puntos de venda oficiais. A camiseta de adulto e a de muller parten dos 89,99 euros, mentres que a versión de neno está dispoñible desde 79,99 euros, en ambos os casos con opción de personalización con nome e dorsal.
Con esta terceira camiseta, o Deportivo pecha o catálogo de equipacións da tempada 2026-27, tras a primeira, presentada o 2 de xullo, e a segunda, de cor negra, que se deu a coñecer o día 14 do mesmo mes.
