Meses despois da súa saída do Deportivo, Óscar Gilsanz agarda unha proposta atractiva que o devolva á ‘roda’ dos adestradores. Coa perspectiva do paso do tempo, o técnico betanceiro fixo un repaso no pódcast Non Vale Furar da súa etapa como branquiazul, desde os triunfos coa canteira ata chegar ao primeiro equipo. Un tempo no que destaca un nome por riba dos demais: o de Yeremay Hernández.
Segundo el mesmo describiu, trátase dun xogador «diferente» ao que afirma terlle «un cariño especial por moitas cousas». Con todo, non ten problema en admitir que na súa relación houbo «encontronazos», o que non deixa de ser algo normal no mundo do fútbol entre os xogadores e o corpo técnico. Aínda así, «el respéctame e eu respéctoo a el moito», o que fai que haxa un bo trato entre ambos os dous. «Vai seguir mellorando sendo un tipo normal», afirma.
Para Gilsanz, o ’10’ deportivista valora «esa estabilidade e ese contexto para medrar», o que o converte nunha persoa particular nun ámbito no que os cartos están á orde do día: «Vexo a Yeremay con ganas de quedar e ao Dépor con ganas de medrar con el». Unha sensación que ata o de agora vai acorde aos feitos, toda vez que o canteirán rexeitou propostas moi suculentas para seguir na casa defendendo as cores branquiazuis.
O novo Deportivo de Antonio Hidalgo
O feito de non adestrar permítelle a Gilsanz seguir ao tanto do que fai o club dentro da Segunda División: «Creo que vin o 95% dos partidos de Segunda División nestas oito xornadas e o equipo que maior capacidade ofensiva ten en canto a ritmo é o Dépor». Unha análise «obxectiva e con distancia» dun plantel renovado para o desafío de pelexar polo ascenso a Primeira División.
Para intentalo, a dirección deportiva optou tras a súa marcha por contratar a Antonio Hidalgo, ao que considera «un grandísimo adestrador» botando unha ollada aos feitos. «Demostrouno nos sitios nos que estivo e vai facelo aquí tamén», sentenza. Polo de agora non vai mal encamiñado.
A entrevista completa a Óscar Gilsanz en Non Vale Furar
