A previa do Deportivo-Andorra terá música galega. A plataforma estudantil «Aquí tamén se fala» organiza este domingo 17 de maio un concerto gratuíto coas bandas Boyanka Kostova e Lume do Loop na contorna de Riazor, dentro da campaña «O Dépor é da Coruña» e coincidindo co Día das Letras Galegas. A cita está programada para as 12:30 horas, hora e media antes do inicio do encontro fronte ao Andorra, que arrincará ás 14:00.
A xornada chega cunha carga simbólica engadida polo encaixe co 17 de maio. A plataforma, nacida no IES Rafael Dieste, busca converter os arredores do estadio nun espazo de encontro arredor da música galega, do fútbol e da defensa da identidade da cidade e do club. Boyanka Kostova, dúo compostelán pioneiro do trap en galego, mantén ademais unha conexión histórica co deportivismo polo tema dedicado a Diego Tristán que durante anos soou en garitos e xuntanzas blanquiazules.
Unha plataforma con apoio social e institucional
«Aquí tamén se fala» sumou nos últimos meses o respaldo de máis de 300 centros educativos e de entidades como a Real Academia Galega, o Consello da Cultura Galega, o Concello da Coruña, a Deputación da Coruña ou a Xunta de Galicia. Desde a plataforma aproveitan a convocatoria para volver pedirlle ao club que «escoite o clamor popular» e dea o paso definitivo cara ao nome de Real Club Deportivo da Coruña, unha reivindicación que veñen impulsando desde hai meses.
Continuidade do traballo da mocidade arredor de Riazor
A iniciativa dá continuidade ás accións que a mocidade coruñesa vén promovendo nos arredores do estadio durante os últimos meses. Entre elas destaca o concerto sorpresa de Grande Amore antes do encontro fronte ao Eibar e o reparto de máis de 40.000 adhesivos da campaña «O Dépor é da Coruña», que volverán distribuírse este domingo durante a actuación.
Con esta nova convocatoria, a plataforma estudantil reafirma a súa aposta por facer da lingua galega unha ferramenta de encontro, de celebración social e de orgullo colectivo, levándoa ás rúas, ás aulas e tamén ás inmediacións de Riazor antes dunha das tres finais que aínda lle restan ao Dépor na pelexa polo ascenso directo.
