Fernando Vázquez quixo deixar claro na previa do Deportivo vs Celta B que dende o vestiario branquiazul afrontan o partido como un máis na súa busca do ascenso: «Non o vexo coma un derbi. A rivalidade do Deportivo é co Celta, non con seu filial. A situación é dura, dolorosa para o deportivismo, pero que ninguén pretenda converter este partido nun derbi, porque non o vemos así. Non hai máis presión, nin penso como se viñera o Celta en Primeira, non sinto esa presión dun derbi de verdade. É a realidade e hai que aceptala. Se a afección do Celta o considera motivo de burla… arrieiros somos e no camiño nos atoparemos. Paréceme un erro pensar neses termos, pero cada un é libre».
Fernando Vázquez, molesto pola sanción de Lara
Expresando o seu desexo de que Diego Rolan siga, pero sen saber que vai pasar, e apuntando que baralla diferentes opcións para solucionar a falta de xogadores de banda, Fernando Vázquez critico precisamente o motivo da ausencia dun deses xogadores con desequilibrio como é Lara: «Xa considerei excesiva a expulsión. Non me parecía, pero se encima son dous partidos… está así escrito e non tes nin recurso. Hai que soportalo. Paréceme un atentado privarlle ao fútbol dun xogador. Que xa non digo Lara, imaxinade que fora Messi. Por unha tontería que lle prohibas xogar dous partidos… é ir contra o propio fútbol. Xa vin ao árbitro moi nervioso. E cando a situación supera aos árbitros… a formación mental dun xuíz nun partido ten que ser alto. E neste caso creo que estaba por debaixo do estándar«.
A emoción por volver ver xente en Riazor
Non ocultou Fernando Vázquez a súa ledicia por ver Riazor de novo con xente nas gradas: «Estou expectante e emocionado. Xa vin o comportamento do deportivismo o primeiro día e espero unha atmosfera marabillosa. Reencontrarse co fútbol, esa relación equipo-grada. Hai un espírito diferente, e vívese de xeito diferente. É fútbol en estado puro. Os xogadores sentirán esa calor, ese empuxe. A sensación vai ser importante e diferente».