Co obxectivo cumprido e «unha celebración suave» para festexar a salvación, o Fabril de Óscar Gilsanz deu por pechada a tempada este domingo cunha vitoria fronte ao Oviedo Vetusta. Hugo Ríos, porteiro do filial deportivista, foi o protagonista branquiazul no A Balón Parado, onde fixo balance da campaña a nivel individual e colectivo, ademais de ‘mollarse’ sobre o partido do primeiro equipo ante o Barça Atlètic.
Unha permanencia sufrida ata o final
«Foi un ano complicado. Houbo moitas subidas de xogadores ao primeiro equipo, sobre todo na primeira volta cando subían moito Diego, Kevin, tiraron moito de Marotías… Debutaron máis de dez xuvenís con nós, que tamén di moito do ben que se está traballando desde abaixo. Non só desde o Fabril ó primeiro equipo, senón tamén desde o Xuvenil para subir ao filial. Deron todos o nivel e demostrouse na clasificación que todos os que subiron aportaron e foi un ano moi bo para toda a canteira e para o Fabril tamén».
A rotación na portería
«Foi un bo ano. Os obxectivos persoais e do equipo, que era a permanencia, cumpríronse. Os porteiros alternamos e creo que o míster tomou unha boa decisión porque creo que o rendemento dos dous foi óptimo. Cando aos dou nos tocou actuar fixémolo ben e creo que foi unha boa decisión do míster».
A vitoria fronte ao Real Oviedo Vetusta
«Os partidos, sexan os que sexan, tómoos con moita tranquilidade. Creo que é fútbol e por moito que te xogues vai seguir séndoo. Hai que tomalo con calma. Foi un partido difícil e sabiamos que por moito que o Oviedo estivese descendido é un filial e ten outros obxectivos. Estaba claro que non ían regalar o partido. A expulsión do seu porteiro beneficiounos e soubemos poñernos por diante. Tivemos o partido controlado e desde o 1-2 o Oviedo non volveu tirar a porta».
A charla de Gilsanz no descanso
«Entramos ao vestiario falando todos con todos do que estaba a ocorrer. Foi o míster o que chegou e pediu calma, que ninguén falase. Foi el quen deu un paso á fronte para darnos as claves porque era unha segunda parte na que tiñamos que dar un paso adiante. Eles estaban cun menos e tiñamos que intentar aproveitar as ocasións que tiveramos para que fose un partido tranquilo e controlado».
A preparación durante a semana
«Ó final foi unha semana diferente. É certo que se falaba de contra quen xogaban o resto de equipos. Traballouse como todas as semanas e os místers déronnos as claves para poder gañar. Todo saiu como se pensaba e outro ano máis en Segunda Federación, que é unha categoría que curte moito. Atópaste con equipos como o Pontevedra ou o Ourense, que están ben feitos para a categoría e está moi ben poder competir con eles».
Sorpresas da última xornada
«Sorprendeume bastante a derrota do Avilés, sobre todo porque o Ourense xa estaba ascendido. Había equipos galegos xogándose cousas e fixeron o seu papel como ten que ser».
¿Firmas o empate o domingo?
«Non. Quero que esto acabe xa, que o primeiro equipo chegue ao fútbol profesional e todo vaia ben. Creo que o equipo vai ben preparado, o estadio vai ser unha caldeira e van lograr o obxectivo».
