Fernando Vázquez continúa dándolle voltas ao sistema que empregará no Pontevedra vs Deportivo. Ante a posibilidade de saír cunha defensa de cinco, preguntóuselle ao adestrador que lle parecen as críticas automáticas a ese debuxo: «Paréceme unha crítica absurda e de pouco coñecemento futbolístico. Mirade no fútbol internacional, cantos equipos o xogan… e xogaron sempre. Non me considero un adicto ou un superfan do sistema de tres centrais. Pero segundo as circunstancias, síntome na liberdade de poder utilizalo. E non é para defender mellor, ás veces tamén e para ter solucións mais doadas en ataque. Ademais, se estivera nun equipo no que xogar con tres centrais fora un pouco raro, entendería que os afeccionados se estrañasen. Pero nun club coma o Dépor, que ademais se fixo grande xogando así… non entendo moi ben por que crea polémica. Pero cada un que opine o que queira».
O de Castrofeito falou tamén do 4-4-2 en rombo que propuxo ante o Racing e os puntos fracos que pode verlle: «Traballo necesitan todos os sistemas. Hai algúns que son máis seguros para organizarse en defensa. Un rombo ten máis problemas porque ten lagoas a nivel defensivo, porque centras moita xente en mediocampo e tes que estar moi coordinado para que non che fagan dano. O rival pode xogar por fora con dous e facerche dano. Ten problemas de organización defensiva para ser estable, pero dáche moito a nivel ofensivo. Non hai un sistema perfecto».
Recoñece Fernando Vázquez que o seu obxectivo é ser un equipo máis profundo, que finalice máis xogadas, pero sen perder a solidez atrás: «Non ten sentido destruír algo que fas ben en beneficio de algo que nunca se sabe. Quero un equipo equilibrado. A excelencia sería controlar o partido perfectamente, que non che fagan ocasións e que si as fagas con cerca continuidade. Sempre construín equipos que teñan certa seguridade, porque se non controlas o partido é perigoso. A teoría da manta está ben, pero hai que asumir riscos controlados para crear ocasións sen que a ti che toquen a cara«.
Fernando Vázquez recorda a Romay e a importancia da súa baixa
Fernando Vázquez tamén tivo palabras para Romay, ao que tivera durante un verán facendo a preparación co primeiro equipo do Deportivo: «Teño falado moito con el. Era un rapaz que me gustaba, quizá despois me puido ter decepcionado porque esperaba un pouco máis del. Cheguei a ter falando con el e parecía que podería ter dado cousas importantes no Deportivo. Adestrou co primeiro equipo, xogou partidos… pensaba cousas positivas del. E o Pontevedra está notando que é un bo futbolista. Dalle algo moi especial, espero que non sexa unha baixa longa porque é unha perda importante para eles«.