Cada vez que se achega #onosoderbi, un dos temas máis recurrentes son as declaracións do pasado. Cruces de palabras entre futbolistas de Deportivo e Celta, cos seus diferentes puntos de vista. Porén, e independentemente do tempo que falte para a disputa dun partido así, cando a un dos dous equipos non lle vai demasiado ben, tamén é habitual ver comentarios nun ton máis suave, máis harmonioso. Acontece nos últimos tempos. E onte volveu a ocorrer en Vigo, con Sergio Álvarez como protagonista.
Preguntado en rolda de prensa polo panorama que se vive na casa do eterno rival, o porteiro celeste amosouse moi respetuoso. Como ven sendo habitual nel. «Evidentemente é unha situación complicada, unha situación difícil. Nós aquí o primeiro ano de estar en Primeira División xa o vivimos. Sabemos o que é estar aí abaixo e todo o que se sufre«, recoñeceu. «Evidentemente nós no vestiario estamos máis pendentes de nós, pero si que é certo que nos gusta xogar ese derbi. E sempre digo que se máis equipos galegos están en Primeira División, mellor vai a ser para Galicia e mellor para todos«.
Sempre consecuente coas súas palabras, Sergio xa manifestara no pasado algunhas declaraciones semellantes. Sen ir máis lonxe, en outubro de 2016 explicaba como entendía el esa rivalidade entre Dépor e Celta. «Ten que existir e cando non exista non será bo para Galicia. Pero a rivalidade ten que ser sa para que todos poidamos ir ó campo cos nosos fillos ou sobriños, e cada un coa súa camisola. Ó final un irase máis ledo que outro, pero que ao chegar á casa se poida gozar de piques sans«, aseguraba.
O exemplo do meta non é o único. Se ben é certo que no seu caso non sorprende tanto, polo seu carácter tranquilo, si o fai no caso de Iago Aspas. Máis temperamental, o futbolista de Moaña foi corrixindo a súa maneira de expresarse. Tanto é así que, en decembro, e despois de disputarse o derbi da primeira volta, o dianteiro tamén tivo boas palabras. “Quero ó Depor en Primeira, os derbis son o bonito para todo o mundo”, afirmou en El Larguero tras derrotar ao equipo coruñés. A volta da Selección Galega e as campañas de «Imposible sen ti» explican mellor estas afirmacións.
