fbpx

A análise de Yago Iglesias: Tudelano

0

Na nova temporada, estreamos sección: A análise de Yago Iglesias. Cada semana, contamos coa súa firma na previa dos partidos. O extécnico da SD Compostela é o encargado de analizar ao rivais do Deportivo para riazor.org. Nesta segunda entrega é o turno do Tudelano. O Deportivo visita o Ciudad de Tudela este domingo (17h).

Contextualización

Despois desta primeira xornada na que todos estabamos esperando que arrancara a nova competición, xa puidemos ver os primeiros atisbos do que van ser as liñas xerais do nivel da Primeira RFEF. As armas, os sistemas, os plantexamentos dos distintos equipos segundo as estratexia do seus adestradores, etc.

Neste caso, o Tudelano enfrontase ao Deportivo despois de perder nos últimos 5 minutos de partido contra o Racing de Santander. É un equipo que foi ao Sardinero a competir de ti a ti e durante moitos momentos foi quen de meter en problemas ao Racing. Despois de ter amarrado un punto, no treito final perdeuno.

Foto: CD Tudelano

Idea de xogo colectiva

En canto á análise táctica, é un equipo moi veterán, con moita experiencia, comezando xa polo seu adestrador, Javier Olaizola. Parten dun sistema 1-4-4-2, que por momentos é un 1-4-2-3-1. Predominantemente a sua fortaleza é o xogo directo, sobre todo buscando a Pablo Caballero e as transicións rápidas. Sen balón, é un equipo que defende moi ben. Xúntase ás mil marabillas nunha estrutura de bloque medio baixo, esperando recuperar e saír moi rápido. Se o rival lle cede a iniciativa, todo o seu xogo pasa a ser directo con Pablo Caballero, e a partir de aí atopar xogadores exteriores como Yasin ou Santi Samanes; ou ben deixar de cara sobre Álex Gualda para que el distribúa o balón.

Especialmente, o Deportivo esta fin de semana ten que ter atención coa xente da fronte do ataque, destacando Pablo Caballero e Alain Ribeiro, que son os referentes nesa idea de xogo máis directo e nas transicións. Evidentemente, unha vez chegan ás inmediacións da área, traballan moito o centro lateral para buscar a estes dous xogadores.

Xogadores destacados

Álex Gualda, mediocentro. É o que cando o Tudelano ten balón ou o rival lle deixa dispoñer del, dá orde e sentido táctico á circulación de balón. Tamén é especialista a balón parado, todo o que sacan pasa polas súas botas.

Pablo Caballero, dianteiro moi alto (1’91m). Traballa moi ben de espaldas, capaz de facerse con balóns practicamente imposibles, dá moita guerra aos centrais. Nese senso, os centrais do Deportivo van ter en fronte un perfil de dianteiros moi distintos aos do día do Celta B. Miguel, Alfon, Javi Gómez… Eran máis de correr, agora os do Tudelano van ser dianteiros máis de zafarse, máis de pelea, máis de contacto.

Por detrás de Pablo Caballero, está Alain Ribeiro, que tamén é un xogador de moita presenza física, pero moi dinámico. Un chegador que é capaz de gañar eses segundos balóns e de circular. Aínda por enriba é rápido para os desmarques ao espazo.

Por último, na banda dereita do Tudelano, Yasin Iribarren, que é un xogador menudo, de bo 1 contra 1, de boa chegada. Cando ten espazos, mete o balón á área

Conclusión

Como resumo, este domingo, o contexto que vai atopar o Deportivo en Tudela vai ser completamente distinto ao da semana pasada. Con certos matices. O Celta B, como xa dixeramos na previa, ia buscar esas transicións rápidas, pero este equipo é máis de xogo directo. É un equipo moito máis veterán, moito máis asentado, sobre todo na faceta defensiva.

Basa todo o seu poderío en defender ben e a partir de aí transitar. Xa o seu adestrador, Olaizola, o ano pasado no Arenas, tivo un dos equipos menos goleados do grupo. É dicir, dalle moitísima importancia a manter a portería a cero para, a partir de aí, as ocasións que xere, intentar marcar e levar o partido. Sobre todo, vai ter que cambiar certos rexistros o Dépor porque, aínda por enriba de que o tipo de xogo é mais directo -especialmente aéreo con estes futbolistas corpulentos-, o campo non vai ser Riazor.

Sobre el Autor

Ads Blocker Image Powered by Code Help Pro
Bloqueador de publicidad detectado

Hemos detectado que estás usando extensiones para bloquear los anuncios. Esta página web se financia gracias a los anuncios de publicidad, con lo que te rogamos que los desactives para que podamos seguir trabajando de forma diaria.

Recargar