Fernando Vázquez mostrouse satisfeito co triunfo do Deportivo ante Unionistas, volvendo a subliñar que agora mesmo están en construción: «O máis importante foi a vitoria. Nestes momentos o equipo está para gañar. Independentemente dos medios que poidamos poñer para conseguilo. É importante sacar puntos á espera de futbolistas e que o desenvolvemento do equipo poida producir triunfos máis doados, se é que podemos conseguilos. Viñemos buscar un bo resultado nun campo moi difícil, ante un bo rival que está acostumado a este terreo de xogo e cun adestrador intelixente».
O técnico insiste en que non está molesto coas críticas, pero pídelle confianza aos afeccionados: «Non me doen, pero podería preocuparme que as críticas se trasladasen á afección e que pensaran así. O que me parece moi importante é que os seguidores crean que hai un bo equipo. Que confíe e que crea, porque nese contexto, os futbolistas son mellores«.
Vázquez, contento por mellores individuais
No dubidou Fernando Vázquez en eloxiar a boa parte dos seus xogadores de xeito individual: «Álex demostrou intelixencia para saltar, saber cando facelo… pero que imos dicir de Álex. Serve para todo. Se o necesitásemos para varrer, sería un gran varredor. Celso subiu especialmente o seu nivel neste partido, todo o mundo sabe o futbolista que é. Héctor fixo un gol e un partido moi interesante, e Valín, extraordinario, estivo impecable».
