Fernando Vázquez tivo esta mañá a amabilidade de responder a unha pregunta dun compañeiro de Vigo durante a rolda de prensa previa ao Unionistas vs Deportivo. O motivo é a visita da Real Sociedade a Balaídos o próximo domingo e, co equipo donostiarra, o regreso de David Silva ao estadio celeste, onde o técnico de Castrofeito o tivo ás súas ordes. Vázquez non aforrou eloxios para o canario, desvelando ademais unha anécdota na que acertou de pleno o futuro de Silva nada máis deixar o Celta.
“Adestrei a grandes futbolistas e David Silva está entre os mellores, claro. Xogaba no Eibar, digamos que o Valencia non o quería… pedimos a cesión e aceptaron. Chegou algo lesionado, pero xogou un ano espectacular. Era impresionante. Ademais, velo adestrar era para coller unha cadeira e sentarte a mirar. Tiña a admiración do seu técnico e de todos os compañeiros. Un rapaz extraordinario, o fillo que queres ter. Ese era Silva“.
A oportunidade perdida do Celta con David Silva
Fernando Vázquez recoñeceu que, no seu momento, o Celta deixou pasar unha gran oportunidade cun xogador que se lle puxera a tiro: “Puido quedar no Celta, porque o Valencia vendía. Pero o Celta non quixo ou non puido compralo. Recordo que veu falar comigo e me dixera que non quería volver ao Valencia, porque el sentía que non o querían alí. E así era. Penso que era Quique Sánchez Flores o adestrador. E díxenlle que fora tranquilo, que cando Quique o vira adestrar, ao cuarto ou quinto partido xa ía ser titular. O resto da historia está aí. Indiscutible e logo traspasado por un valor impresionante“.
