Fernando Vázquez comezou a rolda de prensa previa ao Unionistas vs Deportivo facendo unha reflexión dirixida á afección do Deportivo. O técnico recoñece que o equipo non está tendo o mellor inicio en canto a xogo e acepta as críticas, pero pide que non se deixe de crer: «A crítica é necesaria, non sei se son precipitadas. Só quero trasladar a opinión de que non podemos caer na tentación de pensar que ou temos o obxectivo conseguido xa, ou nada. Teño a impresión de que temos que ter xa o obxectivo conseguido ao segundo partido. Preocúpame que a xente poida perder a esperanza, a ilusión e a fe nos xogadores. Realmente podería dicir que o equipo vai ser aquelo que a afección queira que sexa. Se ti cres no equipo, o equipo vai dar un nivel superior e ser un equipo máis competitivo e cun fútbol mellor. Se desconfías, ese ‘feeling’ chega ao equipo e é posible que non se poida chegar as cotas para o que eu creo que está preparado. É importante saber que o obxectivo se ten que conseguir cando se ten que conseguir, o que hai que facer agora é que os futbolistas sintan que son bos xogadores, e que van formar un bo equipo. Axudaría ao adestrador, ao equipo, ao club… que esa unidade que me transmitían o ano pasado non se rompa de inicio porque quizá o equipo non estea a xogar como se esperaba que xogase«.
O técnico falou do ben traballado que ve a Unionistas e referiuse ao céspede sintético: «Vannos poñer as cousas dificilísimas. É un equipo ben preparado e despois está o hándicap de xogar en herba artificial. Polas características do terreo, o que ocorre moitas veces é que as diferencias técnicas e incluso tácticas, iguálanse moitísimo. Son campos que igualan aos rivais de xeito extraordinario. Non busco escusas, pero son realidades. Imos ter problemas, e iso máis alá do nivel do rival, que venceu ao Compos e sacou un gran empate na casa do Pontevedra«.
Fernando Vázquez non quixo dar pistas sobre o once e posibles cambios, aínda que si afirmou que ve a Uche a un nivel moi superior. Recoñeceu tamén que ao equipo lle falta traballo: «Falta certo desenvolvemento. Non o temos traballado en profundidade e as rutinas non están ben entendidas nalgún caso. Falta traballo. A situación é comprensible. Estamos nunha situación complicada e está sendo duro, sobre todo a nivel psicolóxico. É posible que nalgún momento o equipo intente algo e por falta de rutina de adestramento, non o saiba levar a cabo con perfección. Estamos lonxe. Pero tampouco quero ser un equipo que me pase os 90 minutos sobando a pelota. Quero vivir doutro tipo de situacións e nese reto estou poñendo ao equipo. Xogar máis directo, máis rápido… e cando teñamos a pelota saber desenvolvernos con ela».
A situación de Diego Rolan
Fernando Vázquez segue esperando a Diego Rolan e explicou como será o trato co uruguaio cando volva, independentemente do tempo que pase en A Coruña: «Non sei cando virá. Cando chegue, falarei con el, preguntareille como está e vereino adestrar. É un futbolista do Deportivo. Se considero que ten nivel suficiente para competir cos seus compañeiros e demostra que é mellor futbolista, vouno utilizar. Que mo quitan despois de catro partidos porque hai que vendelo? Que marche. Pero se o teño e é noso, procurarei sacarlle o máximo rendemento posible. Se despois o club decide que hai que vender, que marche».
O corpo técnico de Fernando Vázquez
Unha das sorpresas da semana foi que a rolda de prensa posterior ao Compos vs Deportivo a dera Álex Bergantiños. Isto fixo que aparecesen dúbidas sobre cal é o corpo técnico de Fernando Vázquez e, sobre todo, o seu segundo adestrador. O de Castrofeito teno claro e sinala que o problema non é máis que administrativo: «Os que están máis cerca de min son Franganillo, Manuel Pombo, que é o preparador, e David Sánchez. Non lle podo chamar segundo adestrador, seica… chamémoslle axudante. Ademais de axudante técnico é analista, porque considero que podo elixir unha persoa como axudante meu sen que teña o título nacional, que é o que lle falta a David para desenvolver a súa función en todos os seus conceptos. A persoa técnica de confianza é el. Pero esa función non a pode facer no banco, porque non ten o título nacional, entón o que se dirixe aos futbolistas é Pombo porque así está no regulamento».
