Lonxe de conformarse, Fernando Vázquez volveu insistir que dentro do vestiario do Deportivo son os primeiros en ser críticos co xogo do equipo. O adestrador sinala un factor clave: «A dinámica e o ritmo do equipo é o que me preocupa un pouco. Mentres non teñamos dinámica e un ritmo alto, poderemos facer poucas cousas. Que o equipo sexa máis fluído, que teña máis enerxía. Non sei cal é a razón polo que falta iso. Non sei e foi a preparación, pero sinto que ao equipo lle está custando levantar o voo. Rodar con máis fluidez polo campo. As causas poden ser múltiples, pero o efecto é que teño a sensación de como si foramos aínda un pouco pesados. Estamos aínda nunha marcha monótona e fáltanos chispa«.
Un dos aspectos que o técnico quere mellorar é a presión adiantada: «Quero demostrar que somos capaces de facelo durante 90 minutos. A ver se o facemos un partido enteiro serio neste sentido, e que logo sexa o resultado o que nos diga se funciona ou non. A idea é intentar expoñer iso e a ver que pasa. Teño que buscar fórmulas, camiños para levar ao equipo a que ao final estea seguro do que estamos a facer. E que ese camiño nos prepare para as fases finais. Temos tempo e é un proceso que hai que seguir».
O Racing e a posibilidade de xogar con tres centrais
Fernando Vázquez dedicoulle eloxios a Álex López, que non estará en Riazor, «a todos os adestradores nos molesta non ter aos mellores futbolistas», pero confía en ver a un Racing forte: «É un equipo bonito, ben estruturado e que sabe ao que quere xogar. É un equipo con personalidade, forte e que ten individualidades importantes».
Non desbota o de Castrofeito a opción de xogar con tres centrais: «Eles actúan con tres, laterais largos e dous dianteiros. Unha posibilidade cómoda é igualar o sistema. Enfrontarse e ser un espello. É o máis seguro porque iguala. Pero quizá despois para buscar vantaxes ofensivas non sexa o máis axeitado. Estamos pensando se podemos sacalas xogando doutra maneira».
O que si espera o adestrador branquiazul é unha mellora do Dépor tendo en conta o nivel dos próximos rivais: «Son rivais directos, pero eu véxoo como unha posibilidade de sumar tres puntos. Iso é o importante. Sexa Racing ou Pontevedra, hai que facer puntos porque ademais tamén miramos de esguello ao outro subgrupo porque queremos chegar en posición de vantaxe. Eu creo que si nos van a esixir algo máis de nós, que o equipo dea algo máis de nivel e espero que comecemos a dalo«.
Fernando Vázquez e o debut de Diego Rolan
A mellora no rendemento e as baixas en ataque poden provocar que Diego Rolan debute o domingo: «¿Para cantos minutos está? É complicado valorar iso. O que me parece máis importante é cando sería interesante que xogara. 90 minutos custaríalle, claro. En que momento, esa é a clave. Pero está para xogar e podería ter minutos«.
