Fernando Vázquez volveu insistir na necesidade de que os seus xogadores consigan dominar a presión e se acostumen a render sen importar a responsabilidade coa que afronta o Deportivo esta tempada. É posible trasladar o visto na Copa á liga?, o técnico responde: “Falo disto cos xogadores, claro. Xogar estando pendentes do resultado non é fácil. Digamos que contra o Alavés comezamos 0-0, pero nese partido xa íamos gañando. O domingo con 0-0 xa estaremos perdendo. É un pouco esa sensación. É individual, é colectiva… pero hai que saír sen que o resultado che importe en exceso. Como se consegue iso? Non é sinxelo para ninguén. Somos o que somos e temos responsabilidade. E enfrontarnos a iso é un hándicap. Temos que remontar os 0-0. É unha situación mental que hai que aceptar e intentar superar”.
O adestrador branquiazul recoñece, de todos xeitos, que ve ao seu equipo con máis moral: “Está confiado, seguro. O partido contra o Alavés veu ben para que se den conta de que teñen nivel, que son competitivos. Seguiremos mellorando para amosar a mellor cara e que non nos poida a responsabilidade. Estase vedo que estamos mellorando, na segunda volta espero un Dépor mellor, creo que vamos ir superando niveis de rendemento e que se verá a un equipo mellor, máis seguro e, se pode ser, cun fútbol máis atractivo“.
A explicación de Fernando Vázquez polas numerosas lesións
Despois de coñecer outras tres novas lesións no Deportivo, Fernando Vázquez recoñeceu que non sabería dicir os motivos, pero que é algo xeral no mundo do fútbol esta tempada: “Hai informes, en España e Europa, no que se ve que as lesións subiron de forma extraordinaria. A situación non é a máis normal en moitos equipos. Non só nos pasa a nós. Podemos estar na parte alta, pero estiven lendo un informe que di que as lesións aumentaron case nun 50 por cento en toda Europa. As razóns? Non o sabemos”.
O Zamora e os problemas meteorolóxicos do domingo
Para rematar, Fernando Vázquez tamén falou do Zamora, “é un equipo moi ben organizado e que nos pode crear problemas, pero penso que sabemos como contrarrestalos”, e expuxo a súa maior preocupación para esta semana. A meteoroloxía: “Estou preocupado porque polo visto, van empeorar. Non sei o que pode pasar. Vendo e lendo o que estou a ler, imos ter problemas importantes para poder viaxar, pero son cousas que pertencen a outro ámbito e nós estamos metidos e centrados no partido. Se se pode celebrar, claro. Non vai ser doado”.
